LEGAZPI CITY — Mapadagos hasta sa aga, Mayo 3 an pigkokondusir na job fair kan Public Employment Service Office (PESO) Albay katakod naman kan month-long celebration kan Magayon Festival 2017.
Segun ki PESO Albay provincial manager Lily Nicoleta, rinibong aplikante na an nagruso sa Albay Astrodome para sa enot na aldaw kan job fair para sa mga Albayano.
Inimbitar suboot ninda an 22 na recruitment agencies kun saen rinibo man an job vacancies.
An sarong ahensya suboot na nakabase sa CALABARZON an nagkaigwa nin urgent hiring kun saen kinakaipuhan nin nasa 500 na persona.
Plinano man suboot ninda na dae isabay an job fair sa selebrasyon kan Labor Day ngane na matawan nin tyansa an iba pang job seekers.
Abiso man ni Nicoleta sa mga naghahanap nin trabaho na oras makua o mahire kan sarong kumpanya, kaipuhan na gibuhon sa maray na paagi an itinaong responsibilidad ngane na maghaloy sa nakuang oportunidad.
