LEGAZPI CITY – Nakuwa kan sarong 10-anyos na aki an sarong rifle grenade sa sarong salog na sakop kan Barangay Calabnigan, munisipalidad kan Virac sa provincia kan Catanduanes.
Segun ki Virac Municipal Police Station Chief of Police, Police Major Robert Kevin Caparroso sa intrevista kan Bombo Radyo Legazpi na narisa kan joven an sarong nakalubog suboot sa irarom kan tubig mantang nagkakarigus ini sa salog kun kaya nagdesisyon ining kuwaon asin iuli sa saindang harong asin ipinahiling sa saiyang tugang.
Pigdara suboot kan saiyang tugang na nagkaklase sa Reserve Officers’ Training Corps (ROTC) an nasabing granada nganing maghagad nin tabang sa saindang corps commander na tulos man nakipagkoordinar sa saindang hepatura.
Naghagad sinda nin asistensya sa Explosive Ordinance Disposal personel kan provincia siring man an pagpapadara sa area nin imbestigador asin patrollers nganing matawan nin maray na disposisyon an nasabing pampasabog.
Ipigpapasalamat kan opisyal huli ta aram kan mga aki kun ano an saindang nakuwa asin dae na pigkawatan asin pinili na sanang itago muna an granada bago itao sa mga otoridad.
Padagos an saindang pakikipagkoordinar sa mga Explosive Ordinance Disposal personel nganing madeterminar kun haloy nang panahon nakalubog an rifle grenade na nakuwa sa lugar.
Sa presente, ini an enot na bes suboot na may na-ireport asin may na recover na arug kaining mga bagay sa lugar.
Pagirumdom ni Caparroso sa publiko na ireport sa mga kapulisan enkaso may marecover sinda nin ano mang klase nin pampasabog asin ibitaran an pag-hiro kaini nganing maibitaran an biglaang pagsabog.
