Gadan an sarong rider makalihis ining badilon kan duwang iba pang rider na nagsita saiya huli sa pag counterflow sa sarong tinampo sa Quezon City.
Mahihiling sa CCTV footage an duwang motorsiklo na nakasabat nin saro pang motorsiklo na counter-flowing, asin nagriribayan nin taramon an mga nakasakay.
Dae nahaloy, iginilid kan nag-counterflow na rider an saiyang motorsiklo asin pigranihan an duwang rider na nagpundo man.
Mantang nagrarani an nag-counterflow na rider, bigla siyang pinutukan nin badil kan duwa.
Segun sa pulisya, nagibo pang makadulag kan biktima, alagad binawian nin buhay makalihis magsapo nin tama kan bala sa daghan.
Nadakop an saro sa duwang suspek sa pambabadil sa biktima sa Caloocan City sa ginibong follow-up operation kan kapulisan sa Quezon City.
Nadiskubre kan mga otoridad na dati nang naatubang sa nagkapirang kaso an saro sa mga suspechado.
