Paramientras na nakalaya si dating Senador Ramon “Bong” Revilla Jr. makalihis magpiyansa nin ₱1 milyon para sa saiyang pigkakahampang na kasong malversation.
Inaprubaran kan Sandiganbayan Third Division ang saiyang petisyon para sa temporamenteng libertad mantang nagpapadagos an paglilitis.
Naghale siya sa Quezon City Jail Male Dormitory sa Payatas bandang alas-6:16 nin banggi.
Segun sa desisyon kan korte, tinugutan siyang magpiyansa huli sa nagpalyar an prosekusyon na magpahiling nin matibay na ebidensya kan pagkakasala sa yugtong ini kan pagdangog.
Magigiromdomang nahahampang si Revilla sa mga kasong graft asin malversation katakod kan suboot anomalya sa ₱92.8-million “ghost flood control project” sa Pandi, Bulacan, na makapirang beses na man pignigar an anumang pagkakasangkot sa nasabing scheme.
Solamenteng an petisyon sana ni Revilla ang pinagbigyan mantang sinayumahan kan Sandiganbayan ang aplikasyon para sa piyansa kan saiyang mga kapwa-akusado.
Enot nang nagbayad si Revilla nin P90,000 na piyansa para sa hiwalay niyang kasong graft sa irarom kan Fourth Division. Huli aprubado na man an saiyang ₱1-M bail para sa malversation, dagos na siyang nakauli.
