Nagsayuma an mga abogado ninda dating Senator Ramon Revilla Jr asin anom sa saiyang kapwa akusado, na dating opisyal kan DPWH Bulacan 1st District Engineering Office para sa plea bargaining sa kasong graft.
An plea bargaining an sarong proseso sa mga kasong kriminal kun saen kalimitan an akusado an matuga sa saiyang pagkakasala sa sarong kaso kapalit kan mas magian na padusa o pagbasura nin ibang kaso, na nangangaipuhan nin pag-uyon kan biktima, akusado asin prosecutor asin aprubado kan Judge na dumidinig kan kaso.
Hinapot kan korte an lado kan mga akusado kun ikinokonsidera ninda an plea bargaining alagad negatibo ang naging tugon kan depensa.
Segun sa abogado ni Revilla na si Atty. Francesca Señga, wara sindang plano sa ngunyan na magsunad nin kadugangang mosyon sa korte. Magigiromdomang sinayumahan kan Sandiganbayan an gabos kan naenot na mosyon na isinunad kan lado ni Revilla.
Sa ibong kaini, sinabi kan abogado na nakahanda sindang tumalima sa rulings asin kasuguan kan korte asin naglalaom na ipagpapadagos kan hukuman an hearing sa kaso nin patas.
