Nagpapadagos an retrieval operation kan mga otoridad sa duwang indibidwal na magtugang na inanod kan agos kan salog sa sarong barangay sa banwaan kan Oas sa provincia nin Albay.
Segun ki Governor Noel Rosal sa intrevista kan Bombo Radyo Legazpi na nahanap na an saro na wara nang buhay mantang padagos pang pighahanap an saro pa.
Naglalaom sinda na mag-marhay na an kamugtakan kan panahon ngonian na aldaw nganing maipagpadagos an retrieval operation asin mahanap an saro pang nagtetenir na nawawara.
Pigtatarabangan na an operasyon kan Albay Public Safety and Emergency Management Office, Arm Forces of the Philippines asin iba pang law enforcement agencies para sa marikas na paghahanap.
Pigtaram pa kan opisyal na ipigsugo niya na sa saiyang mga personahes na gibuhon an gabos nganing mahanap an hawak kan nawawarang indibidwal kun wara na ining buhay.
Abiso man ni Rosal na kun bako man sana importante an dudumanon an dae na muna magluwas sa saindang kaharongan para na man sa saindang kaligtasan urog nang pigkansela na ni Department of the Interior and Local Government Secretary Jonvic Remulla an klase asin trabaho sa ofisina kan gobierno sa provincia.
