LEGAZPI CITY—Nagsumiter nin sarong resolusyon an nagkapirang opisyales kan gobierno provincial kan Albay mapadapit sa pagsulog nin violet na bado kada Biyernes kan bulan nin Marso, en koneksyon sa pagselebrar kan National Women’s Month.
Segun ki 2nd District Board Member, Chairperson, Committee on Women, Children, and Family, Atty. Melissa Abadesa-Armedilla, sa intrevista kan Bombo Radyo Legazpi, na an nasambitang resolusyon gikan man sa kahagadan kan Provincial Social Welfare and Development Office na pig-eengganyar an mga empleyado kan kapitolyo sa pagsulog nin violet na bado bilang parte kan pakikisumaro sa naunambitang selebrasyon.
Dugang kaini na dakol man suboot an nakalatag na mga aktibidades katakod man kan pagselebrar kan Women’s Month, siring kan kick-off activity, lecture asin awarding sa mga kababaihan na Persons Deprived of Liberty (PDLs), asin culminating activity.
Mientrastanto, pigtaram kan opisyal na an pagselebrar kan Women’s Month bako para ipahiling na superior an mga kababaihan sa mga kalalakihan kundi katuwang ini ninda.
Afuera digdi iyo para mapahiling na kaya man kan kababaihan na makipagsabayan sa mga kalalakihan nganing mas paki-pakinabang sa komunidad asin pamilya.
