LEGAZPI CITY—Dakula suboot dan pasasalamat kan mga residentes kan Barangay Basud, sa banwaan kan Bacacay, Albay urog na an mga naka-istar sa Purok 2 sa ikinonstruhir na dike sa nasabing lugar.
Basado sa datos sa Sumbong sa Pangulo website, igwa digding ipigbugtak na flood control project na may Project Description na “Construction/Improvement of Flood Control at Basud, Bacacay, Albay”, kun saen an contractor an Hi-Tone Construction and Development Corporation (formerly FS Co Builders and Supply) na may kantidad na P138,408,985 asin completion date na December 15, 2022.
Segun ki Kapitan Elmer Belardo kan Barangay Basud Bacacay Albay, sa intrevista kan Bombo Radyo Legazpi, natapos an pagkonstruir kaini kan taong 2022 na pareho sa datos na yaon sa Sumbong sa Pangulo website.
Segun saiya na nagin maray man suboot an implementasyon kaini asin hasta sa ngunyan wara pa man sindang nanutaran na destroso sa nasabing proyekto.
Dakulang kaginhawaan suboot ini para sa mga residentes kan na-implementar ini sa Purok 2 huli ta kan dati piglalaog nin tubig baha an lugar urog na pag may kalamidad.
Mientrastanto, dae man suboot aram kan saindang barangay kun gurano an pondo na ipigtagama sa proyekto huli sa dae man ini sinabi kan nakipagkoordinar sainda.
Sinabi sana suboot sainda an mapadapit sa pagpapatindog kan proyekto asin kun pirang metro ini, asin segun saiya, na dae niya aram an computation kun talagang nagkakantidad an proyekto nin nasa P138 milyon.
Dugang kan opisyal na dapat maaraman kan barangay kun gurano an ipigtagamang project costs sa sarong proyekto nganing ma-monitor asin ma-implementar nin tama an sarong proyekto na naglalaog sainda.
