LEGAZPI CITY – Pig-aagrangay kan mga residente kan Barangay Budiao, Daraga, Albay an pagkaraot kan saindang tulay na nagkokonektar kuta pasiring sa kataraid na barangay.
Segun ki Salvador Martillana, residente kan naunambitang barangay sa intrevista kan Bombo Radyo Legazpi na pahirapan ngonian an pagbalyo kan mga residente urog na an mga estudyante, negosyo asin nagtatrabaho na obligadong maglakaw nin harayong distansya huli sa tinampong dae na maagihan kan mga behikulo.
Mawot ninda na magibuhan nin aksyon an naraot na tinampo asin gibuhan nin spillway nganing magin matibay na an pundasyon kaini laban sa raot nin panahon.
Alagad pagdoon kaini na puro pa man sana paglaom an saindang namamatian huli ta may mga opisyal kan gobierno na nagbibisita asin naglalatag na nin plano para sa pagpapakarhay kan tulay.
Afuera sa tulay an dae man nagin problema sainda an mga pag-uuran sa nakalihis na magdamlag huli sa mga dike na pigbubulusan kan mga tubig.
Sa presente an pangapodan ninda Martillana sa gobierno na magibuhan nin sulusyon an naraot na tulay huli sa labing epekto kaini sa saindang mga residente kan barangay Budiao.
