LEGAZPI CITY — Pigkukumpirmar pa sa presente kan mga otoridad an ipinaabot na report kan sibilyan na igwang nanotaran na mga iridong personalidad sa Brgy. Lubigan, Bato, Camarines Sur.
Kasunod ini kan nangyaring engkwentro sa pagultanan kan tropa kan gobierno asin mga pigtutubudang miembro kan Concepcion Organized Criminal Group kan nakaaging Agosto 12 sa Brgy. Del Rosario kan kaparehong banwaan.
Sa intrevista kan Bombo Radyo Legazpi ki SPO1 Paul Paloma, investigator on case kan Bato Municipal Police, nagpapadagos pa an ipigsasagibong clearing operation kan puersa tangarig na maarestar an mga ini mantang wara pang nakukuang body count.
Napag-araman na narekober man kan Regional Mobile Force Batallion (RMFB) 5 sa isinagibong clearing operation an sarong yunit kan Glock 17 Gen 4 na kargado nin anom na bala.
Susog sa inisyal na beripikasyon sa badil, posibleng ini an ipig-isyu sa nagadan na si PO1 Noel Pili na naka-engkwentro man kan kaparehong grupo sa Brgy. San Antonio Poblacion, sa banwaan kan Nabua kan Hunyo 8.
Ipigturn-over naman an nasabing armas sa kustodiya kan RMFB 5 para sa magkakanigong disposisyon.
