LEGAZPI CITY-Buminagsak an 24-metros na replica kan Statue of Liberty sa luwas kan Havan megastore sa Guaíba, Brazil kan Disyembre 15 makalihis na tamaan kan makukusog na paros huli sa raot nin panahon sa lugar.
Segun sa mga otoridad, warang nairehistrong nairido sa insidente matapos maebakwar an mga tawo asin behikulo sa palibot kaini bago magbagsak an nasabing istruktura.
An nasabing replica, itinugdok kan taong 2020 bilang parte kan branding kan Havan retail chain na bisto sa pagpapatugdok kan mga Statue of Liberty replicas sa saindang mga tiendahan.
Nagtenir na bilog an konkretong base kan estatwa maski pa buminagsak an mismong istruktura, kaya dai nadanyaran an edipisyo.
An pagbagsak kaini, nakuwaan nin video asin naglakop sa social media, na nagresulta sa mantinding orolay kan publiko.
An insidente saro sa mga danyos na kawsa kan makusog na bagyo sa rehiyon kan Rio Grande do Sul ngonian na bulan kan Disyembre.
