Makusog na pinahimutikan ni Ako Bicol Partylist Rep. Zaldy Co an mga alegasyon na ipig-akusar saiya sa ginibong hearing ngonian na aldaw kan Senate Blue Ribbon Committee dapit sa anomalya na flood control projects.
Sa mensaheng ipinadara ni Representative Co sa media, inapod ni Representative Co na kautikan asin warang basehan an mga nasabing alegasyon.
Tinawan doon ni Rep. Co na tutukaron niya an nasabing isyu sa tamang panahon asin sa tamang forum.
Sinabi ni Ako Bicol Partylist second nominee Rep. Alfredo Garbin na duwang semana na siyang dae nakakaulay kan kapwa kongresista na si Rep. Zaldy Co.
Pahayag ni Garbin, nagsabi si Co na nasa U.S. siya para sa sarong medical check-up sa Sept. 24.
Lininaw ni Garbin na bako siya awtorisado na magtaram para ki Co.
Pagdoon niya na an mga abogado ni Co an mataram manungod sa mga alegasyon.
Tinawang-duon man ni Garbin na dae imbwelto sa anuman na iligal na aktibidad an Ako Bicol Party-list.
Aminado si Garbin na nakukulugan sinda sa mga nangyayari alagad dae man sinda apektado asin padagos pa man giraray an saindang trabaho.
