LEGAZPI CITY – Kinumpirmar kan Mines and Geosciences Bureau (MGB) na paramientras na ipinapundo an rehabilitation sa minahan kan Rapu-Rapu, Albay.
Sa intrevista kan Bombo Radyo Legazpi ki Kristine May Baldeo, Information Officer kan nasambitan na ahenya, paramientras ining ipinapundo huli ta dae pa nag-aabot an pondo na kinakaipuhan digdi.
Segun sa opisyal, ipig-deposit kan mining company an pondo na nagkakantidad nin P309 million para sa total rehabilitation ngani na iwgang magamit sa pagpakarahay kan lugar na saindang pigmina.
Dugang pa kaini na sa presente igwa pang work and financial plan na kinakaipuhan na isumiter asin nangangaipo pa nin revision an final mine rehab plan.
Pigduon man kan opisyal na kinakaipuhan munang magkonsulta sa komunidad an kumpanya kun ano an mawot kan mga ini na mangyari sa mining site.
Mientrastanto, sa presente 27% na man suboot an na-accomplish sa lugar huli ta difisil talaga na liwat na patubuon an mga tinanom kaya nangangaipo ini nin halawig na panahon na aabuton nin hasta sa sampulong taon.
