LEGAZPI CITY- Pigpapabirepeka ngunyan ni Mayor Cenon Bulante, an alkalde kan banwaan kan Malilipot, Albay an listahan kan mga matatawanan nin harong para sa rehabilitation huli sa pagrarasay kan daga sa Barangay San Roque.
Ini an huli ta nagdakol suboot an mga mawot nang mag-ebakwar kun sain nasa 25 na pamilya man sana an orihinal na nakatalaan na tatawanan nin harong.
Segun ki Bolante, igwa na man na nagkapira na nagrani sa sainda na nagtataram na magpa-reserve na man nin lote ngani na igwa nang malipatan enkaso man madamay na man sinda sa nangyayaring landslide sa nasambitan na lugar kaya pig-iisipan na man ini ngunyan.
Dugang pa kan alkalde na pighahalat na sana an resulta kan ipigkondusir na survey sa relocation site huli ta dae pa nagtatao nin presyo an nagsagibo kan survey kun gurano an kantidad kan babakalon na lote.
Inako man kan opisyal na saradit sanang harong an saindang maitatao ngani na magkasya an gabos na pamilya na nangangaipo nin malilipatan sa babakalon na lote.
Mientrastanto, balik normal na man ngunyan an supply kan tubig sa banwaan makalihis na madanyaran kan mga nakalihis na kalamidad.
