LEGAZPI CITY- Nag-abot na sa ciudad kan Legazpi an mga garden tools hale sa Department of Agriculture (DA) para sa mga paraomang naapektuhan kan nakaaging pagputok kan bulkang Mayon.
Ipigheras ni City Agriculturist Jess Callos sa intrevista kan Bombo Radyo Legazpi na pinunan naman an rehabilitation efforts sa nasabing sektor alagad dae pa pigtutugutang makalaog sa 6-kilometers permanent danger zones.
Ipigkakahadit kaya an nagpapadagos na abnormalidad kan bulkan na nasa Alert Level 2 status kaya nagkaag nin sarong communal vegetable garden an lokal na gobierno na harayo sa danger zone tangarig na masimbagan an iba pang pangangaipo kan mga apektadong paraoma.
Napag-araman na nag-abot sa P6 million an production loss sa nasabing sektor kan ciudad.
Sa opisyal nang pagdideklarar kan panahon kan tag-init ngonian na semana, ipigkakahadit man kan opisina asin mga paraoma an magiging epekto kaini sa produksyon asin piglalaomang pagsakat kan presyo kan mga barakalon sa local market en kasong magbaba ang suplay kan agri products.
