LEGAZPI CITY- Naka-deploy na an labi sa 2,000 na personahes kan pinagsarong puersa kan Police Regional Office 5 (PRO5) asin Armed Forces of the Philippines (AFP) sa pagbabantay sa provincia kan Masbate katakod kan pagpupuon kan kampanya sa barangay asin Sangguniang Kabataan (SK) elections.
Parte ini kan preparasyon sa matoninong na pirilian sa provincia na enot naman na ipigrekomendar na magin Commission on Elections (COMELEC) under control.
Segun ki PRO5 spokesperson PS/Insp. Maria Luisa Calubaquib sa intrevista kan Bombo Radyo Legazpi na Abril 30 pa kan ipadara an mga nasabing personahes na compuesto kan mga hale sa yunit kan Police Community Relations (PCR), Investigation, Legal Service, Special Action Force (SAF) o pigsasabing “One-Stop Shop”.
Dugang pa ni Calubaquib na naka-full alert status na an Regional Special Operations Task Group (RSOTG) sa pamamayo ni Deputy Regional Director for Operations S/Supt. Jerry Linsagan asin nasa close monitoring sa mga barangay na mainit an pirilian 24/7.
Ipigdesignar man si PS/Supt. Froilan Navarosa bilang officer in-charge kan Masbate Police Provincial Office.
Mientras tanto, inasegurar man kan PNP Bicol na bako sana an Masbate an konsentrasyon urog na igwa man na standby provisional batallion na nakahandang ipadara sa anuman na parte kan Kabikolan kun kaipuhanon.
