LEGAZPI CITY- Nag-abot na sa 2.5 milyon na regular voters an nagparehistro sa Commission on Elections (COMELEC) Bicol.
Ini an kinumpirmar ni Comelec Regional Director Maria Juana Valeza.
Sigon sa opisyal, nasa labi sa 799,200 man an nagparehistro para sa Sangguniang Kabataan (SK.)
Base ini sa datos na naguno kan Enero 16 ngunyan na taon para sa mga nagparehistro sa huring quarter kan taon 2016.
Para ki Valeza, magayon an nagin resulta kan registration kan ahensya huli na man sa dakol kan numero kan mga registered voters.
Nakatabang suboot digdi an personal na pagpasiring kan mga election officers sa mga barangay asin eskwelahan ngani na irehistro an mga botante.
Dugang pa ni Valeza, igwa man sinda nin satellite registration na pigkukundusir sa manlaen-laen na parte kan rehiyon ngani na urog na mapadali an proseso.
Mientrastanto, dae pa man suboot nin pigpapaluwas na anunsyo an Kongreso kun suspendido an eleksyon kun kaya padagos an saindang pagpreparar.
Hineras man kaini na magkakaigwa nin tsansa an mga babaying nagtatrabaho asin mga ina na makaparehistro sa Marso 8 na eksklusibong aldaw para sana sa mga babaying dae nin oras na makapasiring sa mga election offices.
Pagigirumdom man ni Valeza sa publiko na dae na paghalaton an huring aldaw kan registration huli ta digdi komon na dakol an tawong nagpipila.
