LEGAZPI CITY- Maogmang ipighayag kan Regional Police Maritime Unit Bicol na dakol an saindang akomplisiemiento pag-abot sa pagdakop sa mga iligal na parasisira sa gabos na katubigan sa rehiyon.
Sinabi ni PSI John Paul Nepomuceno, chief operations kan ahensya na dakol na sindang nadakop na imbwelto sa illegal fishing activities sa parte kan Masbate, Tabaco asin iba pang probinsya sa Bicol.
Nagdadayo man kaya suboot an mga taga ibang lugar ngani na mansira sa mga mabaskog na kadagatan asin kun minsan, nagsasagibo nin iligal na aktibidad.
Dugang pa ni Nepomuceno, senyales an saindang mga akomplisiemiento na nagigin matrayumpo an pagpapautob kan mga regulasyon katakod kan paggamit kan mga water resources.
Sa ibong kaini, inako kan opisyal na nagkukulang pa sinda sa ekipahe kun kaya kaipuhan nin tabang gikan sa mga Local Government Units (LGU) ngani na madakop an mga darakulang commercial fishing vessel na imbwelto sa illegal fishing.
Sa ngunyan, iningganyar ni Nepomuceno an gabos na Bicolano na dae matakot na magsumbong sa saindang ahensya kun in kaso igwa nin nanonotaran na iligal na aktibidad sa mga katubigan kan rehiyon.
