LEGAZPI CITY—Ikinundusir kan Department of Agriculture asin National Meat Inspection Service Bicol an groundbreaking ceremony para sa pagpuon kan pagkonstruir kan P210-milyong Regional Meat Laboratory and Administrative Building sa San Jose, Pili, Camarines Sur.
Segun ki National Meat Inspection Service Bicol Regional Director Dr. Alex Templonuevo, sa intrevista kan Bombo Radyo Legazpi, saro ining 3-storey building kun sain sa ibaba an magigin administrative office, laboratory sa 2nd floor, mantang training center an 3rd floor.
Makikinabang digdi an gabos nin slaughterhouse magin mga meat establishment na accredited kan saindang opisina sa bilog na rehiyong Bicol.
Magigin research hub man ini kan mga veterinary medicine students kan Bicol University Guinobatan asin iba pang State Universities and Colleges sa rehiyon.
Afuera digdi, an nasabing pasilidad an maberipika para sa food safety compliance asin pagtao nin license to operate sa mga meat establishment kan Bicol.
Oras na magpuon na an konstruksyon an malipat muna an opisina kan NMIS Bicol sa San Agustin, Pili mantang pigkonstruir an nasabing edificio.
Posible man na magin operational ini antes an pagtapos kan taong 2027.
