LEGAZPI CITY- Nagpahayag nin pagpabor an regional director kan National Bureau of Investigation (NBI) Bicol na si Atty. Thomas Enrile sa propuesto ni House Speaker Pantaleon Alvarez na gibuhon na multipurpose an NBI clearance.
Sa intribista ki Atty. Enrile sinabi kaini na puon pa kan saiyang pagtukaw bilang chief kan nasambitan na ahensya, naobserbaran nya na an nagkapirang problema na kaipuhan na baguhon o iimplementar kun sain kabale na an obheto kan nasambitan na clearance.
Enot nang pighayag ni Avarez na dapat ining magamit sa iba pang bagay ngani na dae masahutan an ahensya na nagdidilensya sana sa pagtao kaini.
Suhestyon man ni Enrile na gibuhon na totalmenteng online an pag-apply para sa NBI clearance kun sain dae na dapat pang personal na magpasiring sa opisina an mga aplikante ngani na magbiometrics.
Ini suboot an talagang pig-aapod na online application.
Saro pang mawot na mangyari kan opisyal na i-adaptar sa bilog na Pilipinas an National ID system huli ta kumpleto na suboot ini sa datos asin maiibitaran na an pagkakaigwa nin “hit” o kapangaran na komon na nagpapahaloy sa pagproseso kan NBI clearance.
Kan mahapot man ini dapit sa pagpasa ni Presidente Duterte sa war on drugs efforts sa PDEA, sinabi kaini na dae man nin magigibo kundi magsunod sa direktiba kan chief executive.
