LEGAZPI CITY—Posibleng mag-isyu nin gate pass an Rawis Elementary School sa ciudad kan Legazpi, Albay sa mga malaog na non-government vehicles sa nasambitang eskwelahan en koneksyon sa insidente nin suboot pagbalo na magdukot nin aki sa nasambit na eskwelahan.
Segun ki SDO Legazpi Spokesperson Dr. Santi Araña, sa intrevista kan Bombo Radyo Legazpi, na an aki bako estudyante kan naunambitang eskwelahan alagad nasugo sana ini na magkua nin feeding kan saiyang tugang kun saen may bigla na sanang nagpundo na nakamotorsiklo sa saiyang hampangan asin may ipighapot na lugar.
Dugang digdi na tulos man na naghali an nakamotor alagad binalikan kaini an aki asin may kairiba na suboot na puting van kun saen pigpasakay ini.
Segun man sa salaysay kan aki na an sabi kan nakamotor pigpasakay suboot siya para makaibahan niya an magurang huli ta makararigos suboot kairiba an pamilya.
Kun kaya kan nahiling kaini na may pigkua sa bag an lalaki, tulos na nagdalagan an aki asin nakalaog sa bisinidad kan Rawis Elementary School.
Wara man suboot na plate number an nasambit na van asin an yellow na motorsiklo.
Huli sa insidente, an pamayo kan eskwelahan nagkaigwa nin ideya na magpaluwas nin gari gate pass sa mga non-government vehicles na malaog sa nasambitang eskwelahan.
Naghagad naman ini nin tabang sa barangay kan Rawis na tawan sinda nin asistensya kan mga barangay tanod lalo na sa oras kan paglaog asin pagluwas kan mga estudyante ngani na mabantayan asin maasigurar an saindang kaligtasan asin ngani dae na mangyari an suboot na insidenteng pangdudukot.
Sa ngunyan pag-ooroloyan pa kun pano iimplementar an nasambit na lakdang.
Mientrastanto, nangapudan man ini sa mga magurang na bantayan nin maray an saindang mga aki para sa saindang kaligtasan.
