LEGAZPI CITY—Nagkundusir nin Rapid Damage and Needs Assessment an mga opisyales kan lokal na gobierno kan ciudad nin Tabaco makalihis an nangyaring pagyugo kan 5.3 magnitude na linog kan Biyernes, Hunyo 5.
Segun ki Tabaco City Disaster Risk Reduction and Management Office Head Gel Molato, sa intrevista kan Bombo Radyo Legazpi, kabale sa mga nag-atendir an mga punong barangay sa ciudad magin an opisyales kan saindang opisina kun saen nagkaigwa nin initial damage reporting na isasairom man ngunyan sa beripikasyon asin inspeksyon kan engineering.
Makalihis ini, naka-deploy na an engineering team sa mga facilities, mga eskwelahan nganing maaraman an mga nagin danyos kun sain haros mga bitak an nanutaran sa mga edificio.
Aadalan ini sa pakikipagkoordinar sa pribadong grupo, engineers, architects nganing mas maparikas an inspeksyon kan mga nasabing edificio.
Dugang kan opisyal na wara man saindang nairehistrong major damages makalihis an nasabing pagyugo.
Mientrastanto, abiso ni Molato sa namamanwaan na magin kalmado asin preparado siring man na i-report en kaso may mga abnormalidad sa saindang lugar nganing matawan nin aksyon.
