LEGAZPI CITY – Pighahalat na sana kan Sorsogon City Police Station an commitment order hali sa korte katakod kan pagkakaarestar sa numero uno sa listahan kan Most Wanted Person kan nasabing ciudad.
Inaprehender si Cleford Rey Luseugro sa Brgy. Sampaloc kan nasabing ciudad makalihis na isirbe kan nasabing hepatura kan pulis asin PNP Criminal Investigation and Detection Team (CIDT) Sorsogon an mandamiento de aresto.
Sa intrevista kan Bombo Radyo Legazpi ki PLt/Col. Benito Dipad, hefe kan Sorsogon City PNP, napag-aramang nahahampang si Luseugro 8-counts kan patong-patong na kaso kan Rape asin pagbayolar sa Republic Act 7610 o Anti-Child Abuse Law.
Duwa sa mga nasabing kaso an warang kakabit na piyansa mantang nasa P180, 000 sa kada sarong count kan iba pang natatadang kaso.
Konsiderado bilang dakulang trayumpo kan mga otoridad an pagkakaarestar ki Luseugro tangarig maiibitar suboot an komunidad sa huma kan nasabing akusado urog na sa gabat kan offense na kinakahampang kaini.
