LEGAZPI CITY-Naarestar kan mga otoridad an sarong Rank No. 8 Provincial Most Wanted Person sa Sorsogon kun sain natuntun ini sa Purok Bagong Silang San Rafael Puerto Princesa City sa Palawan.
Segun kay Sorsogon Police Provincial Office Spokesperson Police Major Arwin Destacamento, sa intrevista kan Bombo Radyo Legazpi na natuntun an lokasyon kan suspek sa tabang kan kapamilya kan biktima asin naarestar ini katuwang an Puerto Prinsesa Personnel asin Bulusan Municipal Police Station.
Nasa 48-anyos na an suspek kan madakop ini, asin nagtatrabaho suboot bilang construction worker sa Puerto Princesa City sa Palawan.
Nahahampang sa kasong 2 counts nin rape an suspek na nagbabayolar sa Republic Act 8353 Section 7 asin Section 5 huli sa nagin biktima kan suspek an sarong menor de edad.
Basado sa impormasyon kan mga kooperatiba an second cousin suboot kan suspek an saiyang biktima.
Nagtago suboot an suspek sa nasabing lugar kun sain nakapaghanap na nin tarbaho bilang construction worker.
Sa presente, nasa provincia na kan Sorsogon an suspek asin nasa kustodiya na kan Bulusan Municipal Police Station para sa makakanigong disposisyon.
Pangapudan man ni Destacamento sa mga namamanwaan na makipagtabangan sa kapulisan ngani maaksiyunan an mga siring kaini asin matawanan nin hustisya an mga nagin biktima.
