LEGAZPI CITY—Arestado an Rank No. 3 Provincial Most Wanted Person kan provincia kan Masbate sa ginibong warrant operation sa Barangay Tandang Sora, Quezon City.
Binisto an akusado na si alyas “Manny”, nasa legal na edad, may agom asin presenteng nag-iistar sa Quezon City.
Ginibo an operasyon kan mga operatiba kan Talipapa Police Station 3, Quezon City Police District sa pakikipagkoordinar sa Milagros Municipal Police Stations.
Naarestar an akusado sa bisa kan Warrant of Arrest na iniluwas kan Branch 10, Masbate City katakod kan mga kasong duwang rape sa irarom kan Article 266-A, Paragraph 1 katakod kan Article 266-B kan Revised Penal Code na may ipigtalaang piyansa na P180,000.
Siring man an duwang bilang nin Rape sa irarom kan Article 266-A, Paragraph 2 kan Revised Penal Code, katakod kan Section 5(B) kan Republic Act 7610 na warang pigrekomendang piyansa.
Sa presente nasa kustodiya na ini kan Talipapa Police Station 3, Quezon City Police District para sa dokumentasyon asin iba pang magkakanigong proseso.
