LEGAZPI CITY—Kalaboso an Rank No. 8 Regional Most Wanted Person sa ginibong Manhunt Charlie Operation kan Daraga Municipal Police Station, katabang an Regional Intelligence Unit 5 – Provincial Intelligence Team, Provincial Intelligence Unit, asin Albay Police Provincial Office sa banwaan kan Daraga, Albay.
Binisto an suspek na si alyas “Ryan,” nasa legal na edad, asin residente kan nasabing lugar.
Naarestar ini sa bisa kan mga warrant of arrest katakod kan 2 counts nin Statutory Rape sa irarom kan Article 266-A kan Revised Penal Code, na inamyendaran kan paragraph 1 kan Republic Act No. 11648, na warang pigrekomendang piyansa; siring man an 5 counts kan Acts of Lasciviousness sa irarom kan Article 336 kan Revised Penal Code, na may piyansang nagkakantidad na P108,000 para sa kada bilang.
Ginibo an pag-arestar sa paagi kan target intelligence operation sa irarom kan COPLAN (Case Operations Plan) Predator.
Basado man sa beripikasyon sa Enhanced e-Warrant System, wara nang iba pang nakabinbing warrant of arrest laban sa akusado.
Sa presente, nasa kustodiya na kan Daraga Municipal Police Station an nasabing persona para sa magkakanigong disposisyon.
