LEGAZPI CITY- Kinumpirmar kan Ligao City Police an pagkakaarestar sa miembro kan notorious Concepcion Criminal Group na tubong Bicol sa Brgy. Mataas, Tanauan City, Batangas.
Binisto an akusado na si Wilfredo Sasota Jr. alyas “Pidung” asin nagagamit man kan pangaran na “Wilfredo Sasota Rabaca”.
Sa intrevista kan Bombo Radyo Legazpi ki P/Supt. Lorenzo Bacia, hepe kan Ligao City PNP, resulta an matrayumpong operasyon kan pagtatabangan kan nasabing hepatura, Criminal Investigation and Detection Group (CIDG) asin pulisya kan Batangas.
Segun pa sa hepe na si Sasota an rank number 5 sa regional Most Wanted Person kan Bicol na haros duwang taon man na nagtago sa lugar kun saen ini naarestar.
Nahahampang sa patong-patong na kaso si Sasota kaibanan na an pagbayolar sa Republic Act No. 6539 o Anti-Carnapping Act at Article 294 kan Revised Penal Code (RPC) o Robbery puon pa kaitong 2015 na kakabit an piyansang P180,000.00 asin P100,000.00 siring man an 2-counts kan Mu rder kan 2013 na warang ipigrerekomendar na piyansa.
Mientras tanto, nakatalaan man na itao sa impormante kan mga otoridad an P150,000.00 na reward money para sa koordinasyon sa pagkakadakop kan nasabing gang member.
Nakatalaan man ining iturnover kan CIDG sa kustodiya kan Ligao City PNP sa pagsairarom sa magkakanigong proseso sa mga kinakahampang na kaso kan suspek.
