LEGAZPI CITY – Takdag sa kamot kan pinagsarong pwersa kan Women and Children Concern Section kan Manila Police District (MPD) asin kan Guinobatan Municipal Police Station an sarong lalaking tinaguriang Rank 4 Most Wanted Person kan MPD sa Brgy.Malobago, Guinobatan, Albay.
Segun ki Guinobatan MPS Chief of Police, Police Lieutenant Colonel Arthur Tagtag sa intrevista kan Bombo Radyo Legazpi na pinangaranan an suspetsado na si alyas “Sonny”, 61 anyos asin residente kan kaparehong banwaan.
Inarestar suboot an suspetsado sa bisa kan Warrant of Arrest na ipinaluwas kan Regional Trial Court Branch 29, Manila kan Hulyo 5, 2022 mapadapit sa kasong panlulugos asin pagbayolar sa Acta Republica numerado 7610 o Child Abuse Law.
Igwa man ining rekomendadong piyansa na PHP 120,000 para sa enot na kaso asin PHP 200,000 man sa ikaduwang kaso para sa saiyang temporamenteng libertad.
Pigtaram pa kan opisyal na pwedesir na nagbalik suboot sa Guinobatan an suspetsado kan maaraman kaini na may isinunad na saiya na mandamiento de aresto sa Manila alagad dae man girary ini nakalusot sa kamot kan ley.
Naisakatuparan suboot an operasyon an nin huli sa pakikipagtabangan kan manlain-lain na law enforcement agencies kun kaya natakdag an suspetsado sa kamot kan otoridad.
Pigtawan doon man ni Tagtag na kun warang kasalan talaga an sisay mang may warrant of the arrest, mas maray na sana suboot na patunayan ini sa korte kaysa sa magtago na pwedesir pang madugangan an padusa na saindang kakahampangon.
