LEGAZPI CITY – Karsel an bagsak kan pigkokonsiderang rank 1 most wanted person kan rehiyon Bicol makalihis ining madakop sa isinagibong operasyon sa provincia pa kan Cavite.
Segun ki Esperanza Municipal Police Station Chief of Police, Police Major Jayson Garcia sa intrevista kan Bombo Radyo Legazpi na nagin matrayumpo an pagseserbi nin mandamiento de aresto sa suspetsadong binistong si alyas “Arjay”, 37 anyos, construction worker, asin residente kan Barangay Sta. Rosa, Noveleta, Cavite.
Nagibo kan suspetsado an saiyang pagkakasala sa ley makalihis gadanon an sarong parasisira kan taong 2015 kan nagtetenir pa ini sa Barangay Magsaysay, Esperanza, Masbate.
Nagin imbwelto man ini sa mga serye nin paggadan sa kaiba pa an duwang indibidwal kun kaya warang nagporbar dati na magsunad nin kaso huli sa takot na balikan kan mga ini.
Pigtaram pa kan opisyal na naisagibo an operasyon sa pakikipagtabangan kan Provincial Intelligence Unit, 2nd Provincial Mobile Force Company kan Masbate Police Provincial Office, Regional Intelligence Unit, Regional Intelligence Unit 4A; 401st Maneuver Company kan Regional Mobile Force Battalion 4A, Mendez Municipal Police Station kan Cavite PPO, Police Provincial Office 4A.
Nagin padifisilan man an pagdakop sa suspetsado huli sa pagtago kaini sa harayong lugar alagad dae ini nagin ulang nganing maitao an hustisya para sa mga nabiktima kan mga ini maski pirang taon na an nakalihis.
Sa presente dinara an suspetsado sa Mendez Municipal Police Station para sa dokumentasyon asin magkakanigong disposisyon bago darahon sa korte na may hurisdiksyon sa saiyang mga kaso kun sain mahahampang ini sa kasong murder, na warang nakatalaang piyansa asin attempted murder na may piyansang P120,000.
Pagpasalamat man si Garcia sa magayon na koordinasyon asin pakikipagtabantgan kan komunidad nganing madakop an mga indibidwal na nagtatago sa ley.
