LEGAZPI CITY- Reklamo sa ngunyan kan mga crew kan MV Tug Clyde an kawaran nin koordinasyon kan DOH asin lokal na gobyerno makalihis na mag-abot na sa 24 aldaw an dapat na duwang semana sana kutang quarantine.
Nasa 19 crew an lunad kan tug boat na haling Indonesia asin isinairarom sa quarantine sa kadagatan kan Barangay Lidong, Santo Domingo makalihis na magpositibo sa Delta variant kan COVID 19.
Sa intrevista kan Bombo Radyo Legazpi sa kapitan kan barko na si Francisco Vargas, agrangay kaini an kawaran na nin makakaon ngunyan na nasa ika-24 aldaw na kan quarantine kung kaya namomroblema na an saindang crew.
Segun kay Vargas dae man naotob an ipigpromesa kan lokal na gobyerno siring kan aru-aldaw na monitoring asin pagsimbag sa saindang mga pangangaipo mantang naka-quarantine.
Apwera digdi, pigkakangalas pa kan Kapitan kung nata kan Biyernes, Agosto 13 pa sana kan isairarom sinda sa liwat na swab test na ika-23 na aldaw na kan quarantine.
Hagad mga lunad kan tug boat na makipagkoordinar naman sainda an mga otoridad na iyo an may derecho na magsabi kung tatapuson na an isolation asin kung salbado naman sa nakakaolakit na helang.
