Napawarang-sala kan Manila Regional Trial Court si Pura Luka Vega o Amadeus Fernando Pagente sa tunay na buhay katakod ‘yan kan kasong isinunad laban saiya huli sa viral niyang drag performance na “Ama Namin” mantang nakasulot nin kasulotan ni Kristo.
Basado sa nagin desisyon ng Korte na may petsang Hunyo 10, sinabi kan Branch 184 ng Manila RTC sa pangengenot ni Judge Czarina Samonte-Villanueva na dae napatunayan kan prosekusyon an pagkakasala ni Luka “beyond reasonable doubt.”
Kun kaya inabsuwelto siya sa pagbayolar sa Article 201 kan Revised Penal Code asin Cybercrime Prevention Act of 2012 (RA 10175).
Kasabay kaini, ipigsugo man kan korte an pagtao sa P72,000 na magigirumdumang pinyansa ni Luka para sa temporamenteng libertad.
Dae man napugulan kan drag performer na magpasalamat sa saiyang social media sa desisyon kan korte asin binanggit na saro na sana an natatadang kaso.
Sa ibong kan pinawarang-sala, pinagirumduman pa man kan korte si Luka na magin maingat sa mga ipigsasagibong performance urog nang mahiwas an naaabot kan social media.
Magigirumdumang kan Hulyo 2023, nagsunad nin reklamo an grupong Hijos del Nazareno laban saiya huli sa nasabing performance, na inapod nindang “pag-atake sa pananampalataya.”
Naarestar si Luka kan Oktubre 2023 asin idineklarang persona non grata sa pirang mga cuidad sa nacion.
Magigirumduman mang nagkaigwa pa nin fundraising para kay Luka kan mga kapwa kaini drag artists asin supporters kun saen nakaguno sinda nin haros P900,000 para sa magkakanigong piyansa asin gastuson ni Luka.
