LEGAZPI CITY – Pinalagan kan mga opisyales kan Barangay Buyoan, Legazpi City an akusasyon kan sarong mediaman mapadapit sa nangyayaring illegal logging sa saindang lugar kun sain inakusaran an mismong Punong Barangay na nagtatao nin permit nganing magputol nin kahoy.
Sa eksklusibong intrevista kan Bombo Radyo Legazpi ki Punong Barangay Ronaldo Miña, nilinaw kaini na bako siya protector kan illegal logging sa saindang lugar asin dae naggigibo nin siring kaining ilegal na gawi.
Paglilinaw niya man na wara sindang diretsos sa pagtatao nin permit to cut kundi nagtatao sana sinda nin certification na saro sa mga rekisitos na pighahagad kan Philippine Coconut Authority para sa pagtatao nin cutting permit.
Punto pa niya na an pinutol na poon kan niyog an nakatindog harani sa sarong harong na delikado urog na kun may bagyo alagad naapod suboot ining illegal logging makalihis na warang naipahiling na mga magkakanigong papeles an may kagsadiri kan chainsaw mantang boluntad niya man ining ipig-surrender sa pulisya.
Segun pa ki Miña na sa mga siring kaitong sitwasyon, normal sanang magtao sinda nin konsiderasyon urog na kun pwedesir ining makadiskwedo nin sarong tawo alagad pagdoon niya man liwat na an saiyang itinaong certification an saro sana sa mga rekisitos sa cutting permit na pighahagad kan Philippine Coconut Authority afuera pa ini sa papales kan piggagamit na chainsaw.
Ikinakulog man kan boot niya an pagpapalakop nin salang impormasyon kan naunambitang mediaman huli ta sarong poon man sana nin niyog an pinutol asin nagtatabang man sana siya sa mga nagtitios na tawo na pinadakula pa kan ginibong issue.
Kahagadan niya man sa mga media personnel na aramon an bilog na istorya, dae sana magbase sa mga police blotter asin dumanon an punong barangay na imbwelto asin aramon an saiyang lado nganing maaraman kun ano an bilog na pangyayari.
Pangapodan man kan opisyal sa mga chainsaw operator na dae magputol nin kahoy kun wara man nin magkakanigong papeles asin permit nganing malikayan an pagbayolar sa ley asin ano pa man na problema.
