LEGAZPI CITY- Aminadong ikinamundo kan nagkapirang miembro kan Philippine National Police (PNP) sa Bicol an kawaran nin ‘Christmas Break’ ngonian na taon makalihis na itaas sa full alert status alagad mas marhay na suboot an matoninong na selebrasyon para sa mga nasasakupan.
Napag-araman na 24/7 na nakabantay an pulisya ngonian na Yuletide season kasunod kan insidente kan pagsakyada kan mga rebeldeng New People’s Army (NPA) sa rehiyon partikular na sa Magallanes, Sorsogon asin sa Camarines Sur.
Sa intrevista kan Bombo Radyo Legazpi ki PRO5 spokesperson PC/Insp. Ma. Luisa Calubaquib, nangengenot man giraray an seguridad sa mga dapat na tutukan kan kada police unit susog sa ibinabang direktiba ni PNP Bicol Director PC/Supt. Arnel Escobal.
Hinigotan man kan kapulisan an monitoring sa area of responsibility urog na sa pagkakaag nin mga checkpoint asin pag-ooperar sa mga kabubuldan.
Dugang pa ni Calubaquib na mas vulnerable sa mga pagsakyada an mga miembros kan kapulisan asin Puersa Armadas kan Pilipinas na nakasulot nin mga uniporme urog na kun nakasibilyan man an mga mararaot na elementos.
Ipinagsugo man an pagtatao nin situation report sa kada hora tangarig na mabantayan an hiro kan tropa asin augmentation sa mga lugar na igwang kariribukan o insidente.
