LEGAZPI CITY — Nagpaparahay na ngunyan an sarong pulis makalihis na magsapar nin lugad huli sa paninigbas kan sarong lalaki sa Barangay Del Pilar, Viga, Catanduanes.
Segun sa impormasyon na naguno kan Bombo Radyo Legazpi, lunad kan saiyang motorsiklo an biktima na si PO3 Marlon Matienzo na nakadestino sa Bagamanoc Municipal Police kan bigla ining harangan asin inatake an biktima kan suspek na si Leonardo Olino na armado nin tabak.
Huli digdi, napabulagta si Matienzo sa tinampo kan biglang tigbason kan suspek sa tinamaan sa likudan kaini asin sa kamot.
Nagibo pa man na paputukan kan nasambitan na pulis an suspek alagad dae ini tinamaan asin tulos na nagdulag sa kabubuludan na parte kan lugar.
Nagluluwas man sa inisyal na imbestigasyon kan mga kapulisan na may helang sa pag-iisip si Olino.
Sa presente, naarestar na ini asin pighahanda na an isinangat na kasong Frustrated Homicide katakod kan nagibong krimen.
