LEGAZPI CITY- Boluntad na nagsurindir sa Polangui Municipal Police Station an pulis na aktibong myembro kan PNP-PSG-PEU asin nakadestino sa Campo Crame sa Quezon City huli sa kasong nakabinbin kontra saiya.
Binisto ining si SPO1 Ernesto Lladones Jr., 35-anyos na residente kan Brgy. Balinad sa banwaan kan Polangui.
Akusado ini sa krimen na murder na dae nin rekomendadong pyansa.
Sigon ki PCI Arthur Gomez, tagapagtaram kan Albay PNP, nagdulok si Lladones ki PO3 Nestor O. Salire Jr. kan Polangui MPS ngani na magsurindir.
Nag-ugat an kaso kan pulis kan nakalihis na taon kan badilon an sarong soldado sa tahaw kan iwal-trapiko.
Nagadan an nasambitan na soldado asin nagsangat nin kaso an pamilya kaini na homicide kan enot alagad makalihis an imbestigasyon, nagin murder ini sa paagi ni Hon. Judge Edwin Maalat kan RTC Branch 14 kan Ligao City.
Sinabi ni Gomez na nag-agi na sa proper booking an suspek asin pighahalat na sana an commitment order gikan ki Judge Maalat ngani na maaraman kun sain ini ikukulong.
