LEGAZPI CITY- Kusang nagsurendir sa mga otoridad an sarong pulis makalihis an ibinabang warrant of arrest kontra digdi.
Binisto an nasabing pulis na si PO3 Reggie Viñas, 34-anyos na napag-aramang nahahampang sa kasong Attempted Murder susog sa ibinabang arrest warrant ni Hon. Judge Angela Acompañado-Arroyo, Presiding Judge ng RTC Branch 58 kan San Jose, Camarines Sur.
Sa intrevista kan Bombo Radyo Legazpi, kinumpirmar ni P/Supt. Lorenzo Bacia, hepe kan Ligao City PNP na personal pang nagpasiring sa hepatura si Viñas na presenteng nakadestino man sa nasabing lugar makalihis na maresibe an warrant.
Paramientras man na magtetenir si Viñas sa detention facility kan nasabing police unit mantang ipigrerekomenda man an piyansang nasa P120,000.
Katakod kaini, nakasalalay sa magigin dalagan kan ipigsasagibong pagdangog ngonian na aldaw an magigin kapaladan kan nasabing pulis.
Enot naman na nasambit an pangaran ni Viñas kan nasa Legazpi City Police pa makalihis an engkwentro sa sarong holdaper mantang ipig-iimbwelto man an pangaran kaini sa panggagadan sa saro pang pigtutubudang notorious holdupper Macmac Obogne na nadiskubreng wara nang buhay sa banwaan kan Polangui kan nakaaging taon.
Pig-iimbestigaran naman kan Commission on Human Rights (CHR) Bicol asin National Bureau of Investigation (NBI) an kaso ni Obogne na pigsasabing biktima kan extra-judicial killing (EJK).
