LEGAZPI CITY — Namemeligrong masuspinder o diretso nang mahali sa servicio an sarong pulis makalihis na maimbwelto sa kariribukan sa laog kan Paraiso Disco Bar, Brgy. Sta. Remedios, Bulan, Sorsogon.
Binisto an nasabing pulis na si PO1 Rey Gimao, 35-anyos na presenteng nakadesignar sa Bulan Municipal Police Station.
Sa intrevista kan Bombo Radyo Legazpi ki SPO4 Edgar Calupe, investigator on-case kan Bulan PNP, tinawang-duon kaini na mahigot na ipinagbabawal an pagduman kan mga miembro kan pulisya sa mga siring na klase kan establisyemento.
Susog sa testimonya kan mga complainant, nag-iskandalo suboot an pulis sa lugar na ikinaalarma kan mga yaon makalihis na magluwas nin halipot na kalibre nin badil alagad bako man klarado kun ano an pigpunan kan pag-aamok kaini.
Pigsasabing nakainom na si PO1 Gimao kan mangyari an insidente mantang nagduwa-duwa man an mga nagreklamo na magsunad nin pormal na kaso makalihis an nangyari.
Sa ibong kaini, ipighayag ni Calupe na dae pigtotolerar an mga salang lakdang kan nagkapirang miembro kun kaya nag-initiate na nin pagkokondusir nin pre-charge investigation para sa administrative offense na Grave Misconduct kontra sa nasabing pulis.
Dinisarmahan naman ini kan hepe kan Bulan PNP na si Pol. C/Insp. Jeric Don Sadia.
