LEGAZPI CITY- Pigtutubudang mga miembro kan rebeldeng grupong New People’s Army (NPA) an nasa likod kan nangyaring ambush kontra sa mga miembro kan pulisya sa Brgy. Balocawe, banwaan kan Dimasalang, Masbate.
Susog sa nagunong impormasyon hale sa Dimasalang Municipal Police, lunad kan patrol car an mga personahes tangarig na magresponde sa naresibeng impormasyon sa presensya kan mga armadong grupo sa lugar.
Alagad sa pag-abot kan mga ini sa nasabing barangay, bigla na sana an mga ining pinaputukan kan mga armadong persona kan dae pa maaraman na kalibre nin badil.
Huli digdi, nagsapar nin tama si PO1 Mark Andy Llamazares na tulos man na idinalagan sa ospital.
Nagpadara man nin responde an pulisya sa pamamayo ni PS/Insp. Arnel Buncaras na rason man tangarig na makaigwa nin ribayan nin mga putok na nagdurar nin nagkapirang minuto hasta sa magdulag an ibong na lado.
Nagpapadagos pa man sa presente an ipigsasagibong operasyon asin paghahanap kontra sa mga naka-engkwentro kan mga nasabing persona.
