Gadan an sarong pulis makalihis badilon suboot kan saiyang sadiring biyenang babae sa Barangay Poblacion, President Quirino, Sultan Kudarat.
Binisto kan President Quirino Municipal Police Station an biktima sa alyas na “Boy,” 37 anyos, may agom, asin nakadesignar bilang Police Staff Sergeant sa nasabing himpilan asin residente kan nasabing barangay.
Susog sa paenot na imbestigasyon, nauli sa mainitang pagpapasuway an pag-oolay kan pulis asin kan saiyang agom.
Sa katahawan kan tensyon, nagkaigwa suboot nin agawan nin badil.
Nakuwa kan misis an badil asin inabot ini sa saiyang ina, na yaon sa saindang harong.
Mantang papaluwas suboot kan harong asin mapasiring sa garahe an biktima, sinundan siya kan saiyang agom asin biyenan asin digdi na nangyari an pambabadil.
Tinamaan si Boy sa tulak atsin tuminagos an bala sa saiyang likod.
Tulos siyang isinugod sa ospital alagad idineklara mang dead on arrival.
Presenteng nasa kustodiya kan pulisya an biyenan kan biktima na siyang pigtuturong suspek, mantang padagos an imbestigasyon sa insidente.
Nagpahayag man nin labing dalamhati an enterong hanay kan President Quirino PNP sa pagkagadan kan saindang kaibahan na bisto suboot bilang sarong maigos, malalaoman, asin pinarangalang alagad kan batas.
