LEGAZPI CITY — Nakigkig an mga residente maging an mga kataid na barangay kan Brgy. Bascaran, banwaan kan Daraga, sa provincia kan Albay makalihis na makadangog nin sunod-sunod na putok nin badil.
Nagbutwa kaya an engkwentro sa pagultan kan tropa kan gobierno asin mga pigtutubudang miembro kan rebeldeng New People’s Army (NPA) bandang alas-8:00 kasubanggi.
Sa report na ipinadara kan Daraga Municipal Police sa Bombo Radyo Legazpi, nakahampang kan 2nd Maneuver Platoon kan Albay Provincial Public Safety Company na nakabase sa nasabing lugar an dae pa masiertong numero nin armadong kalalakihan kun sain nagdurar nin 25 sagkod 30 minuto an ribayan nin mga putok.
Wara mang nairehistrong casualty sa hanay kan gobierno mantang pig-aaram pa kun may nagadan o nalugadan sa nakalabang grupo.
Mientras tanto, an mga ini an pigtutubudang nanulo kan sampulong heavy equipment sa ipigtutugdok na Bicol International Airport sa kataid na barangay Alobo.
Segun sa security guard na si Marvin Loterte, nanotaran na sana suboot niya na nagliliyab na an sarong crane, sarong mixer, limang dump truck, duwang service na pick-up asin sarong dredger.
Naalarma suboot an mga ini mantang nasa barracks kan madangog an pagsabog nin mga goma kasunod kan warning shots hale sa naghahabol na tropa kan gobierno.
Nagdalagan man an mga ini ngane isalbar an saindang mga buhay hale sa peligro.
Sa ngonian, nasa lugar pa an mga otoridad asin nagpapadagos an imbestigasyon sa insidente.
