LEGAZPI CITY – Nagpatanid an sarong dermatologist mapadapit sa mga klase nin skin infection na nakukuwa sa labing pagbalad sa saldang o kaya ngonian na summer season.
Segun ki Dr. Marivic Bumalay kan Philippine Dermatological Society sa intrevista kan Bombo Radyo Legazpi na saro digdi an pig-aapod na shingles o sarong viral infection na nagkakawsa nin Chickenpox o bulutong-tubig sa mahahawaan na indibidwal.
An mga persona na dati nang nagkaigwa nin chickenpox an may posibilidad na tamaan kan nasabing impeksyon huli ta dae man nahahali an virus sa hawak kan sarong tawo asin may posibilidad na magluwas giraray ini bilang shingles kun magluya an saindang resistensya.
Kalimitang sintomas kan impeksyon an mala-utos na nagkompolan sa sarong parte kan balat kan sarong indibdiwal.
Pigtaram pa kan dermatologist na pwedesir maapektaran an paghiling asin pangdangog kun nagtubo an shingles sa parte kan mata o talinga kan sarong tawo.
Nagpopoon na magsipa an numero kan mga pigtatamaan nin impeksyon poon pa kan nakaaging bulan kan Marso asin nahihiling an peak kaini sa mga bulan kan June asin July.
Labing pag-iingat suboot an kaipuhan kan mga indibidwal na dae pa tinamaan nin utos partikulamente an mga bados asin mga omboy na wara pang bakuna huli ta sinda an madaling tamaan nin shingles.
Pagirumdom ni Dr. Bumalay na kun enkaso magpositibo sa nasabing impeksyon, mas maray na dae na muna magluwas, likayan an pagbabalad sa initan, magkaon nin masustansyang pagkaon asin dae paglingawan na magkonsulta sa mga doktor.
