LEGAZPI CITY — Nagkukundusir nin imbestigasyon an Balud Municipal Police sa probinsya kan Masbate katakod kan pagkagadan kan sarong public school teacher makalihis na makuryente.
Susog sa inisyal na impormasyon na naguno kan Bombo Radyo Legazpi, binisto an nasambitan na paratukdo na si Chuchie Faustino, 55-anyos na residente kan Barangay Panguiranan sa parehong banwaan asin nagtutukdo sa A. Aninang Sr. Memorial High School.
Base sa imbestigasyon na ikinundusir kan Balud MPS, nagluluwas na kakauli pa sana ni Faustino gikan sa eskwelahan kan aksidenteng makuryente na kawsa kan live electrical wire hale sa natumbang poste nin kuryente.
Pigsasabing aksidenteng nakadukot sa bakal na gate an nasambitan na wire na nagkawsa kan pagka-kuryente kan biktima.
Isinairarom sa otopsiya an bangkay kan paratukdo mantang padagos man na pig-aaram kan pulisya kun igwa nin dapat na manimbag sa insidente.
