LEGAZPI CITY — Inasegurar kan Presidential Task Force on Media Security (PTFoMS) na magigin accountable asin transparent an isasagibong imbestigasyon kan mga ipinadarang special agents sa manlaen-laen na rehiyon sa Pilipinas.
Sa intrevista kan Bombo Radyo Legazpi ki PTFoMS Executive Director asin Usec. Joel Sy-Egco, dawa pa aram an kakayanan kan mga personahes, nag-aagi pa man suboot an mga ini sa counterchecking kaya’t dae mangyayari an ‘areglo system’.
Dugang pa ni Egco na bako sana an mga law enforcers an nakabantay sa mga special agents kundi an iba pang kaibanang taga-media kaya’t tulos na maaraman kun siisay man an mabalong makipag-areglo.
Katakod kaini, ipighayag ni Egco na anuman an magigin resulta kan isasagibong imbestigasyon, iluluwas ini asin dae maitatago an katotoohan sa likod kan mga panggagadan asin panghaharass sa mga taga-media.
Magigirumduman na mismong si Presidential Communications and Operations Office (PCOO) Secretary Martin Andanar an nangenot sa send-off ceremony kan mga agents na nakatutok sa imbestigasyon asin pagrebisa sa unsolved cases kan media killings sa nacion.
