LEGAZPI CITY- Kinontra kan nagkapirang opisyal kan Malakanyang sa pagsasabing garing pag-atake sa libreng pamamahayag sa Pilipinas an pag-arestar ki Rappler Chief Executive Officer Maria Ressa.
Sa ekslusibong intrevista kan Bombo Radyo Legazpi ki Presidential Task Force on Media Security (PTFOMS) Executive Director Usec. Joel Sy-Egco, ipigrerespeto suboot kaini an magkakaibang punto de vista kan mga pag-iribanan sa media dapit sa isyu.
Parte man suboot kan buhay-media an nangyari ki Ressa mantang baku naman bago na makasuhan sa pag-otob kan mandato sa pamamahayag.
Alagad sa ibong kaini, ikinamumundo ni Egco an suboot bako patas na kongklusyon kan nagkapira na pinag-iinitan an online news agency huli ta kritiko ini ni Presidente Rodrigo Duterte.
Segun ki Egco, kaipuhan na maging malinaw an ugat kan pagpataw kan arrest warrant, na huli sa kasong cyber libel na kinakahampang kaini huli sa artikulo kaitong 2012 na ipigreklamo kan negosyanteng si Wilfredo Keng. V
Mientras tanto, nilinaw man kan opisyal na dae nagtatalikod sa obligasyon na i-asegurar an seguridad kan mga kapwa mamamahayag sa nacion mantang ipinapaaram an katotoohan sa kada detalyeng ipigsasapubliko.
