LEGAZPI CITY- Pighahangaan ngunian an sarong Public Safety Officer kan Legazpi City makalihis na maibalik sa tagsadiri an napurot kaining wallet na may laog na cash sa Legazpi Boulevard.
Segun kay Rolly Esguerra, an Chief kan Public Safety Office kan Legazpi City galing sa duty si PSO Reu Guanzon Herrera Jr kan narisa kaini na igwang sarong itom na wallet sa tinampo mantang ini an nagmamanehar kan saiyang motorsiklo.
Pigtaong- aram kaini sa naka duty na Police personnel sa lugar an nasabing impormasyon asin pig-abisohan na magpasiring nalang sa saindang opisina kun enkaso may maghanap kan nasabing wallet na may laog na cash na nagkakantidad nin 6,700 pesos asin may kasabay pang picture.
Istorya pa kan opisyal na kinaagahan an tulos na nagpasiring sa saindang opisina an tagsadiri kan wallet na sarong estudyateng taga Market site, Daraga, Albay asin duman na naiuli saiya an nasabing kwarta na gagamiton kaini sa panggastos sa saiyang pagklase asin pambakal sa iba pang mga pangangaipo kan saindang pamilya.
Dugang pa kan opisyal na maski dakol an nagrereklamo kay PSO Reu huli sa pagiging istrikto kaini alagad namamantinir man liwat an saiyang pagiging dependable asin pagiging marhay na enforcer.
