LEGAZPI CITY- Labi an kaogmahan kan Philippine Statistics Authority (PSA) Bicol makalihis ining mapili biling ika- 2nd place sa Top Performing Regional Statistical Services Office (RSSO) sa bilog na Pilipinas.
Segun kay Cecille Briones, OIC Civil Registration and Administrative Service Division,PSA Bicol sa intrevista kan Bombo Radyo Legazpi, taon-taon sa kada anibersaryo kan saindang opisina an pigsasabay an awarding kun saen pigrerekognisar an mga top performing regional offices sa bilog na nasyon.
An 2nd place sa Top Performing Regional Statistical Services Office an pinakamataas na onra na naresibe kan PSA Bicol asin kasabay pa an nagkapirang special awards.
Mientrastanto, nagpasalamat man ini sa gabos na mga personahes kan saindang ahensya puon sa enumerators magin sa mga admin support asin sa mga provincial o division head kan ahensya.
Saro suboot sa naging susi kan saindang trayumpo an impact kan leadership asin pagkakaigwa nin team work kun saen sarabay na naglalaom na makua an saindang mga obheto.
Dugang pa kan opisyal na piglalaoman na talagang pirming nakakasabay an saindang opisina sa nasabing mga award asin kamawotan man kaini na mas malagpasan pa sa masunod na taon an saindang onra asin maipahiling an pagiging epektibo kan saindang trabaho.
