LEGAZPI CITY – Preparado na an Provincial Government of Albay enkasong paapodan sinda ni Presidente Ferdinand Marcos Jr. makalihis madiskubre na pang-anom an provincia sa may pinakadakol na flood control project sa enterong nacion.
Segun ki Governor Noel Rosal sa intrevista kan Bombo Radyo Legazpi na saiyang ipigsugo an Department of Public Works and Highways na magsumite kan gabos na ginibong flood control projects sa provincia makalihis ma-identipikar na duwang contractor na taga-Albay an may pinakadakol na proyektong nakaputan.
Mawot nindang maaraman kun sain ninda ini ipigtugdok asin kun ano na an sitwasyon kaini ngonian kun na-iturn-over na suboot ini sa Local Government Unit o maski kun natapos na.
Paninidugan niya man na kaipuhan talaga kan Albay an mga flood control projects makalihis an mga pagbabaha na namamatean tuyong may bagyo o pag-uuran alagad kaipuhan man na ma-tugdok ini sa lugar na talagang kaipuhan kan siring kaining proyekto.
Ipigsaladawan pa kan Gobernador an nangyaring flash-flood sa banwaan kan Guinobatan na binaha pa sa ibong kan dakulaon na pondo an ipig-alokar para sa pagpapatugdok kan mga flood control projects.
Afuera sa imbestigasyon kan Presidente an magsasagibo man sinda nin sadiring imbestigasyon kun sain napaduman an mga ibinagsak na mga proyekto kan gobierno sa provincia kan Albay.
Paglilinaw niya man na wara man siyang intensyon na mangraot nin pangaran kan ibang tawo kundi mawot niya man sanang maayos an pagkakabugtak o kun may ipigtugdok talaga na siring kaining proyekto sa saindang lugar.
Sa presente an mawot ni Governor Rosal na ilinya an mga proyekto arug kan flood control sa irarom kan Provincial Development Investment Plan kun sain dae pwedesir magbugtak nin ano mang proyekto an mga ahensya kan gobierno nin warang permiso kan mga Local Government Unit.
