LEGAZPI CITY-Pinaghahandaan kan Provincial government kan Sorsogon an duwang pinakadakulang aktibidad kun sain magigin host an probinsya katuwang an national government para sa pagpapauswag kan turismo sa bilog na probinsya.
Segun kay Sorsogon Provincial Tourism Culture and Arts Office Sorsogon Provincial Tourism Officer Bobby Gigantone sa intrevista kan Bombo Radyo Legazpi na magkakaigwa nin darakulang aktibidad na isasagibo sa Marso 2026.
Isasagibo an kaenot-enoting Bicol Regional Tourism Officers’ Summit kun sain planong imbitaran an provincial city and municipal officers sa maabot na Marso 5-6 asin ico-cover an anom na probinsya sa rehiyon.
Magkakaigwa man nin Department of Tourism Regional Directors’ meeting sa Marso 23, kun sain pinagaantisiparan na maatendir an mga haralangkaw na opisyales sa departamento asin iba mga ahensya.
Iimbitaran man an media asin influencers ngani i-promote an bilog na probinsya kan Sorsogon.
Sa presente, nagsasagibo na nin mga preparasyon manungod sa mga partipantes ngani i-welcome an mga turista asin bisita sa mga eco-tourism na mga destinasyos para sa maabot na aktibidad.
Obheto suboot kaini na maipahiling an turismo sa bilog na probinsya asin maikonsidera an mga pagbabago para sa ekonomiya.
