LEGAZPI CITY – Naghahanda an mga otoridad sa Catanduanes para sa pig-aandamang epekto kan La Niña.
Sa intrevista kan Bombo Radyo Legazpi ki Catanduanes Provincial Disaster Risk Reduction and Management Office Emergency Operations Chief Roberto Monterola, igwa na nin mga nakalatag na plano asin mga interventions.
Kaibanan na digdi an pagtatao nin tabang siring kan family food packs sa mga maapektaran kan tag-uran.
Komon na naapektaran an mga abacaleros asin parasira huli ta dae makapagtrabaho lalo na kun matindi an buhos kan uran.
Magin an mga nakaistar sa mga flood asin landslide prone areas an inalerto na man ngani na maibitaran an mga dae pinaglalaomang pangyayari.
Segun ki Monterola aram na man kan mga personahes kan Municipal Disaster Risk Reduction and Management Office an gigibuhon sa panahon kan kalamidad huli ta halos taont-taon ini naeeksperyensyahan sa island province.
