LEGAZPI CITY- Nahihiling kan sarong political analyst na matibay an lado kan prosekusyon sa paglalahad nin naratibo dapit sa articiles of impeachment na pigkakahampang ni Vice President Sara Duterte.
Sa ibong kaini, inihayag ni Atty. Edward Chico sa intrevista kan Bombo Radyo Legazpi na amay pa ngani na magtao nin assesment huli ta halawig pa an pag-aagihan kan paglilitis..
Kan mahapot man an abogado dapit sa epekto kan pagpresentar kan prosekusyon bilang testigo kan mga dating opisyal kan Office of the Vice President asin Department of Education sa irarom kan pamamayo ni Vice President Sara, sinabi kaining igwa na nin dalan na pigsusundan sa saindang mga testimonya.
Paliwanag kaini na sinda defense counsel Atty. Michael Poa, dating OVP Special Disbursing Officer Gina Acosta asin iba pa an dati nang nagtestigo sa pagdangog kan Quad Committee kan Kamara de Representantes kaya aram na an mga impormasyon na ihahayag dapit sa nagkapirang mga kahaputan sa confidential funds.
Dagdag pa ni Atty. Chico na posibleng nagduduwa-duwa man an prosekusyon na ipaapod si Col. Raymund Dante Lachica maski pa nagkapirang beses ining itinuro na nagresibe kan dakulang kantidad kan confidential fund.
Duda kan nasabing political analyst na duda an prosekusyon sa mga impormasyon na ihahayag kaini sa korte asin posibleng dae maantisiparan an mga sasabihon.
Bilang abogado, an kukuwaon suboot na testigo iyo an mga persona na sierto sinda na magpapakusog sa naratibo sa kaso.
